呢幾日睇報紙熱炒中央電視台踢爆「物非所值」珠寶個案，醒起幾年前幫珠寶L買過一條白金鏈，於是問珠寶L：「喂，你賣畀我嗰條白金鏈究竟係乜嘢成色，18K還是750？」珠寶L答：「肯定係18K，二十四分之十八就係75%，歐洲業界用慣公制，將18K金寫做750金，現時大家叫慣晒，用750而少用18K咯。」
照計9999（四條九）金係足金，如果人人老實，無論大陸、台灣、印尼、菲律賓造出嚟嘅金鏈、白金鏈係750嘅話，成色應該全部相同，一驗就知，冇得呃嘅噃。珠寶L話：「確係完全一樣成色嘅，冇人呃你，只不過，意大利造嘅，手工最靚，所以同樣一條白金鏈，係MadeinItaly嘅，售價最貴。」新聞有話內地（中央電視台記者）遊客採訪得知，一啲專做內地客生意嘅「珠寶店」賣白金鏈，寫明Italy，是否正貨呢？
珠寶L笑笑口講：「我哋啲行家好有噱頭嘅，白金鏈冇註明MadeinItaly，只係Italy，點樣解釋，可以用你嘅想像力。我一個老友喺彌敦道開店，賣MadeinItaly白金鏈，售價二千五百元。一位內地遊客睇完，話佢呃錢，因為佢去過紅磡土瓜灣旅遊店睇過，同樣一條Italy白金鏈，只係千五，仲有折扣㖭，我老友費事解釋，叫內地客去紅磡土瓜灣買！」

珠寶L家族經營珠寶鑽石數十年，不做零售，絕不呃人，逢有朋友來港要買珠寶嘅話，珠寶L就帶佢哋去皇后大道中買。有一啲朋友話：「中環租貴噃，買頸鏈要代佢交埋租，係唔係去紅磡買會平好多？」珠寶L一定答：「人哋租金平啫，但要畀40%至50%回佣，啲錢喺邊度嚟㗎？」央視之所謂踢爆，其實無日無之，內地人參加內地旅行社辦嘅旅行團，到咗香港由內地人做導遊，去一啲具備濃厚內地背景嘅商店買貨，以一位資深本地旅遊界人士嘅講法：「內地央視只係踢爆內地人搵內地遊客老襯啫，不過就累親香港嘅聲譽。田北俊主席一上任就收份咁嘅賀禮，認真無辜。」