【爆相爆片】
【灣仔】戴夢夢同太極鼓佬朱翰博（Ricky）越難越愛，Ricky同老婆仍未搞掂離婚手續，但已同夢夢急不及待築愛巢。本報日前收到讀者姜先生「爆相爆片」報料，佢話上周四喺灣仔駱克道一間五金舖，見到夢夢同Ricky一齊買門柄。

幾百蚊貨色

噚日姜先生接受電話訪問話：「嗰日見到佢哋前後腳出現，嗰個男人喺門口泊緊車，戴夢夢先行入舖頭，佢哋研究買木門手抽，男人話想揀銀色同金色，不過夢夢就話要啞黑色，雖然佢哋有商有量，但最後都係聽女仔話買咗黑色，個男人好似鵪鶉咁，仲聽到佢哋喺度講裝修屋企，話大門要點點點。」問兩人揀選嘅門柄貴唔貴？姜先生話：「唔貴，幾百蚊啫，只係普通五金舖，反而隔籬店就好貴。」
今個月初，夢夢同Ricky被本報發現到北角豪宅雲景臺睇樓，租金每月高達4萬多元，之後佢哋又係去駱克道揀地板，睇嚟佢哋都趕緊新屋裝修嘅嘢。前晚夢夢喺社交網貼出餐枱、梳化、吊燈、玻璃櫃、木櫃嘅相片，留言：「二手傢俬大平賣，有興趣請留言。」擺明去舊迎新，唔知呢啲舊傢俬係屬於夢夢定Ricky呢？
採訪：皓騫