【新增短片】
公民黨男神「岳少」楊岳橋今年9月就同事務律師女友Eve去咗丹麥註冊結婚，今日下午楊生楊太就喺立法會附近舉行結婚酒會，宴請全體立法會議員同記者；岳少同老婆Eve都好識做酒會之前就多次錫錫俾傳媒影相，當楊生楊太收到傳媒送上嘅賀卡，更加露出驚喜表情，睇嚟兩人都相當有喜劇細胞。

男神封盤，楊太Eve被問到結婚消息令萬千少女心碎，佢竟然話，「好多人好過佢」，不過之後又兜返話「佢都好好架」。講到岳少有咩吸引之處，Eve就大讚岳少孝順同搞笑，而且追到手之前都好浪漫。Eve又透露去丹麥註冊結婚係佢主意，因為只要120歐元，上網登記，再親身出現就可以結婚，最快最方便。

岳少請飲，不論泛民同建制派議員都俾面出席，立法會主席梁君彥、秘書長陳維安都有現身，而其中經民聯盧偉國更捧住一大扎鮮花到場，而梁美芬就送上一張書籤。直至到財委會完會，唔少民主派都趕尾場出現，慢必陳志全更加罕有打煲呔現身，同場仲有被DQ 嘅姚松炎同長毛梁國雄，立法會都真係難得齊人。