游學修、袁澧林噚晚以盲俠之星身份，去到旺角出席「奧比斯盲俠行」活動，負責舉行起步禮，為奧比斯籌款。游學修話：「今次係第一次參加比斯活動，本身都鍾意夜晚跑步，不過今次呢個係步行就有啲唔同，香港日頭嘅天氣唔太適合跑步，我通常夜晚兩三點至喺街跑，好享受。」

咪睇學修係個大男人，原來佢都好細膽，竟然唔敢夜晚跑山，佢笑話：「夜晚山上係會有啲驚。不過最近都冇咁fit，忙住寫劇本，有個自編自導自演嘅ViuTV劇《仇老爺爺》，我平身喺演藝做編劇，對編劇好熟悉，今次呢個係外判劇，我一個包晒嚟做，做埋男主角，會同鵬哥(盧海鵬)講兩代人嘅對決，仲有個靚女主角，遲啲至公佈。」問佢係咪請咗袁澧林做女主角，學修即耍手話：「佢太貴，請唔起。」

同場袁澧林近排就忙於綵排舞台劇《火鳳燎原》，佢話：「故仔講三國時代，我要打，做一個好似女仔嘅男將軍，即係扮男人，講話要壓低把聲扮粗魯啲，都有難度，但好開心，第一次做古裝，啲衫好靚。本身個角色識易容，會有靚女裝出現，下年一月公演四場，有機會再加場。」