大少田北俊噚日好唔得閒,因為下晝要率領一眾自由黨黨員去政府總部八樓部長樓見煲呔,點都要備吓課。今次截聽條例自由黨立咗大功,獎番粒糖畀田少都啱數,最緊要煲呔保證以後約束吓啲下屬,叫啲AO狗仔隊唔好問長問短,煩住大少爺。
田少見完特首,啲記者問佢煲呔表哥香灼璣霸佔官地單嘢,田少話,佢未得閒睇報紙,都唔知啲記者講乜,真係一頭霧水,跟住急急腳咁走。原來佢趕住同個仔坐直通車上廣州睇NBA夢幻隊,波飛成4,000蚊一張,兩個人夾埋8,000蚊。田太Mary呢?冇份。喂,上次去德國睇世界盃,又係兩仔爺去,咁都得㗎?
睇嚟田太真係對呢個老公好放心,早前田少一句「連老婆都唔敢問我去邊」令佢成為小男人偶像,八方好想知Mary有乜反應?點知熟識田太嘅A小姐叫八方唔使喺度挑撥人哋兩公婆嘅感情,須知Mary同田少,喺美國讀書嘅時候邂逅,青梅竹馬,田少成日都公開讚老婆,話有田太幫手睇實盤生意,佢冇後顧之憂。
聽講田太真係從冇問田少去邊,最多有人約佢夫婦一齊去function,佢就同個秘書check吓老公個diary有冇撞期。