假後復市，一直氣勢如虹的港股再下一城，攻陷全年高位22710，期指曾高見22737，成交進一步增至960億元。上星期五內地公佈了9月份製造業採購經理指數（PMI），除比預期好，更是連升兩個月，應解除先前對內地經濟再次探底的疑慮。
昨日期指裂口高開，開市價已高於之前提及22472關，筆者見大市升勢持續，亦於22550附近加入衍生工具，即市已有賺頭，但執筆時見歐洲股市下跌，大市又久未調整，若跌穿昨日低位22480，會先行走位，吼低位再買入衍生工具。

龍工目標價10.6元

大市持續上升，投資者紛紛問冧巴，但問完都係冇結果，因為大家都有畏高症，見在高位唔買，見由底回升得多亦唔買，昨日又有114隻股票創下一年新高，若情況持續，幾時先買到貨呢？當然，士佳一樣會受到恐懼與貪婪所影響，不過既然認定是升市，有時不能顧忌太多。
之前提及買股票的注碼會分為兩部份，一部份買入優質股長揸，另一部份則捕捉異動股短炒，但捕捉異動股除需要經驗外，亦要專注睇市，未必適合所有投資者，最近自己亦努力發掘一些升幅不小，但估值及前景仍然吸引的個股，早前曾提及的中國龍工（3339）便是一例。
龍工為內地工程機械製造商龍頭之一，受惠於城鎮固定投資穩定增長及西部開發，產品銷量正逐步上升，雖然鋼價回升有一定影響，但從往績看，龍工議價能力甚強，往往能將成本轉嫁顧客，企業質素良好國策又配合，增長空間十足。圖表上，龍工已無重要阻力，似乎蓄勢上試上市以來的高位，士佳會以10.60元作為中長線目標，跌穿6.95元止蝕。
筆者持有中國龍工

張士佳
寶來證券（香港）董事　投資服務部
mailto:[email protected]