雖然唔夠賭王分家咁矚目，但係新地（016）郭氏兄弟內鬥，大家其實都無遺忘！直至噚日有傳媒引述大佬郭炳湘話，自己會喺幾個月之後正式離開新地另起爐灶（淨係留番個非執行董事title），靜咗一排嘅「宮廷內鬥」即時又引起大家追睇劇情發展！噚日出席「瑪雅謎團攝影展」開幕活動嘅二佬郭炳江，自然成為焦點人物。
唔知係咪真係傾掂數同和解在望嘅關係，二佬噚日喺自己地頭──國際金融中心商場睇攝影展嗰陣，全程四萬咁口，情緒仲幾高漲，唔單止同墨西哥駐華大使豪爾赫．瓜哈爾多話，佢對瑪雅文明好有興趣，仲好hyper咁同在場嘅記者玩「捉衣因」！

「咪架」聲東擊西引開記者

之不過，一向同傳媒好talk得嘅二佬，唔知搞邊科，噚日突然刻意迴避大家追訪，公關仲專程在場設置「咪架」，希望引開大家，但係呢招咁舊，最後係唔work嘅，成棚記者立即集體去晒近四季酒店嗰邊嘅門口等，二佬即刻醒水向商場方向離開。
咁大家見狀梗係窮追不捨啦，突然之間，成棚人手拎相機，抬住攝錄機喺商場裏面狂奔，而有主場之利嘅二佬就有5至6個大漢護駕，除咗幫手推開傳媒之外，仲擋住電梯口，令大家無辦法追落去……查實企定定講句nocomment咪大家都好囉，整咩係要搞到大家好似戰地記者咁呢？啲有錢人真係奇怪！

mailto:[email protected]