時裝設計師鄧達智（William）同外科醫生陳梓欣（Clement）下年六月會到英國註冊結婚，噚晚就先喺尖沙嘴舉行婚宴，仲已經交換咗戒指。（新聞連結： http://bit.ly/2wiCSku ）

今晚William同Clement結伴到中環藝穗會出席「香港同志影展2017」，兩人手上戴上婚戒，喺台上分享時，最初手拖手，鄧達智話：「值得畀人知道我有呢位愛人超越過性取向，因為等咗大半生都冇呢個人出現。」陳醫生就話由William追求自己嘅一刻開始，就已經知道佢係一位名人，有心理準備關於自己嘅一切都曝光。

經過噚晚婚宴，兩人都出現疲態，問佢哋噚晚係咪好辛苦好攰？陳醫生話：「William攰啲，晚宴後，朋友話要飲嘢，結果飲到三點幾，我自己瞓，William好勤力，仲寫埋啲稿，搞到五點幾至有覺好瞓。」陳醫生繼續話心情仍然興奮，跟住又即場對住鄧達智講愛的宣言：「我願意一生一世同你走埋餘下人生路。」講完兩個人甜密啜啜，sweet到爆。

講到今次嘅共同生活，鄧達智話：「以前係純純愛情，o依家係雙方嘅生活，過去我怕人與人間嘅相處同生活，但明白到無一個係perfect，所以o依家至係真正考驗嘅開始，對方係一本新書，我要重新去睇一個chapter，行一段新嘅人生路。」

陳醫生習慣早睡早起，鄧達智愛遲瞓，不過佢話往後嘅生活會試早睡早起，鄧達智再話：「我自己對物質比陳醫生仲簡單，拍拖時去吓happy hour，搵好嘅餐廳食飯，近日少咗機會，太多朋友請食飯，但我哋好注重健康，平時多喺屋企煮飯，陳醫生煮嘢好叻，佢都滿足到我，畀佢83分。」