當年今日
關於我們

【李八方online】林鄭11月堅‧離地 四出外訪周圍飛

蘋果日報 2018/09/27 10:56

林鄭月娥李八方ONLINE

超強颱風「山竹」吹跌咗首林鄭月娥嘅民望,政界中人都觀望,林鄭下月發表嘅第二份施政報告,有乜糖派力挽民望?八方反而想知,積極追求創新嘅娥特,喺呢份施政報告發表之時,有乜破格之舉hardsell一下?之前連Facebook直播都玩埋,似乎創新辦要幫佢搞搞新意諗辦法。
當然啦,創新之時都不忘傳統,相信發表報告後見傳媒去電台受訪等環節,繼續有來,整個10月相信都係為咗報告忙,同時仲要睇實盛傳10月底通車嘅港珠澳大橋,唔可以有乜差池!至於11月嘞喎,咪以為佢忙完可以抖抖,據聞林鄭外訪頻頻,包括到上海出席首屆中國國際進口博覽會。
呢個博覽會係國家主席習近平親自宣佈話要搞㗎,據知逾100個國家同地區嘅企業參展,喺中美貿易戰之下,大國明顯不容有失,當中亦設有「香港館」,試問作為特首嘅林鄭,點可以唔親身出席撐習大大兼撐香港?但暫時當然唔知,佢會搭飛機定高鐵啦!至於今年嘅亞太經濟合作會議(APEC)高峰會,就會喺巴布亞新畿內亞舉行,遠就係遠啲嘅,但始終都係國際重要會議,娥特亦點可以缺席?
而貿發局11月初喺日本東京舉行「think GLOBAL, think HONG KONG」座談會,日本外務省日前發出新聞稿透露娥特會出席活動,據知係佢相隔8年再訪日。勤力到咁嘅地步,相信林鄭都唔會「自滿」,唔知咁多時間堅‧離地,會唔會減少市民攞佢嚟「出氣」?
立會補選新聞,《蘋果》一網睇晒
http://bit.ly/appledaily1125