香港大學噚日舉行第179屆學位頒授典禮，仲向美國前總統克林頓同愛滋病專家何大一頒授榮譽博士學位。噚日克仔現身短短20分鐘，雖然有人質疑請克仔嚟係做騷，但睇到台下吸引大批城中名人富豪專程嚟捧場，起碼知道日後搞籌款贊助，應該唔會咁易食檸檬。

典禮喺港大陸佑堂舉行，啱啱做咗候任國務卿老公嘅克仔，到典禮進行時仍未見人，直至大會宣讀佢個名，克仔至好似變魔術一樣，突然出現喺台上，台下嘉賓同師生都起晒哄，唔少人仲當睇明星咁即刻摷部相機出嚟影相！克仔致辭時，大讚港大好好，又話同台上負責頒學位嘅港大校監煲呔已經見過面，雖然呢句說話好簡單平常，但煲呔就開心到即刻企起身向克仔鞠躬回應。
喺儀式上，克仔只係上前同煲呔握手，表示接受博士榮譽，並冇按慣例向煲呔彎腰同俾佢扑頭。唔通係克仔恃住自己係國際大人物，唔肯向煲呔卑躬屈膝，令煲呔再一次被人當冇到？同場接受榮譽科學博士嘅愛滋病專家何大一亦係握手了事。
咁究竟點解煲呔冇得扑頭呢？港大話，皆因克仔同何大一都嚟自美國，佢哋想casual啲，港大尊重佢哋諗法，結果安排大家握手就得。查實今次唔係破例，更加唔係美國前總統個頭唔扑得，好似德蘭修女93年獲港大榮譽博士亦冇扑頭，喺美國、加拿大嘅學位頒授儀式都唔一定要扑頭嘅。
雖然克仔噚日來去匆匆，但台下唔少城中名人都話收貨，好似何鴻燊、方潤華、利孝和夫人等都由頭坐到尾，十足星光熠熠耀保良嘅排場。賭王仲等到睇完克仔離場，先捨得去廁所。

今次港大請到克林頓都算好大面，其實校長徐立之早喺03年已經喺北京清華大學見過克林頓，而克仔又同徐立之個老友何大一喺研究愛滋病上有合作，所以關係非淺，相信等閒之輩頒學位畀佢兩位，佢哋都未必會嚟。𠵱家教育資源短缺，做大學校長好似run一間大企業咁，要諗好多本業以外嘅嘢，容許八方俗啲講句，噚日嘅典禮，絕對係GoodShow一場！