民主派噚日開例行飯會，次次到齊嘅卿姐唔見影，代替卿姐嘅發言人張文光話，原來卿姐入咗廠，𠵱家仲喺醫院瞓緊。立法會開完內務委員會，張文光、張超雄同吳靄儀就做代表去養和探卿姐。
卿姐啲職員話，卿姐前日朝早個肚唔係幾舒服，到晏晝終於捱唔住要入院，原來係盲腸炎，𠵱家仲喺醫院休息，佢代卿姐多謝大家問候同關心！
初時啲民主派個個唔肯講乜病，有啲話卿姐腸胃炎、有啲又話唔知、有啲話都係小事，一度引起恐慌猜測，好彩卿姐都係小病啫！馬丁話，𠵱家都好容易腸胃有事，有次好似係肥龍請食黃油蟹，佢食完都唔舒服又嘔又瀉，真係要小心啦。