女子組合HotCha成員之一張惠雅（Regen），本月九日玩背囊遊，坐火車去西藏旅行，點知一出發就嚇到底褲都濕埋。

之前已講過，Regen準備換車票時，俾職員質疑佢冇「入藏紙」唔可以上車，上到車除晒bra同著住低褲嘅佢，先發現原來有個大叔同佢一個車卡，一額汗。

前後兩個幾星期，Regen嘅旅程仲未完，今日佢又喺Ig貼咗幾張相，其中一張素顏相更是眼腫臉腫，原來係因為高原反應所致。Regen好好心機咁寫咁篇長文講解高原反應，又話咁多日嚟其實佢嘅高原反應唔算好嚴重，但係出發前都做足準備，買咗「紅景天」（生長於高原地區的草本植物）嚟食，希望可以增強抵抗力。

Regen留言話：「進藏前兩日，即係喺火車上嘅第一晚，我連西藥都食埋，不過西藥雖然效果好又快，但係會有少少副作用，譬如手腳有啲麻痺，係咁要放水。」Regen又話今次同行嘅10幾人，有人去到高海拔地區，仲可以又玩又跳，最多只係喘下氣同少少頭痛，令佢甘拜下風。

至於有「少少反應」嘅佢，症狀包括流鼻血同腫過豬頭，Regen話：「流到我以為多咗個姨媽原來一直喺西藏，每日個鼻都有血噴，第二個反應就係腫過豬頭，圖一係我今日終於、終於消咗啲腫正常返！圖二三係前幾日嘅樣 」然後又搞笑hashtag寫「#你係邊個？#口腫 #面腫 #鼻腫 #嚴重 #心口無腫」

有網民就留言笑佢腫咗嗰個樣，可以去北韓徵婚，Regen總結佢嘅經歷，得出結論係：「你越緊張，唔知點解高反會嚴重啲，好神奇。每次提自己放慢番所有動作、呼吸，放輕鬆享受下眼前個風景，你嘅高反就會好啲0架喇！信我！」

精選娛聞，喺晒《娛果》
http://fb.com/appledailyent