加盟無綫30年來擅演三姑六婆和闊太的資深演員廖麗麗，11年曾患上乳癌，經治療後本已康復，豈料今年7月竟不幸患上舌癌，儘管廖麗麗即時切去半條舌頭，但最終因癌細胞迅速擴散到淋巴和肺部，延至上周一凌晨於東區醫院不治逝世，享年70歲。廖麗麗拍過逾百部劇集，最後演出作品是月前剛煞科的《誇世代》，不過歷年最令觀眾印象作品，是《大時代》飾演女法官當庭訓斥丁蟹鄭少秋。

記者昨日聯絡廖麗麗的獨生女Sindy，她在傾談母親抗癌經歷時，數度忍不住痛哭，她說：「佢之前係乳癌，但已經康復，今次係脷癌，轉移到去淋巴。其實佢自己都唔知個嚴重性，走得好突然，佢係一個好堅強嘅人，佢早幾個月發現條脷有粒細痱滋，一路都冇好，我哋都冇為意係嗰件事，冇諗到咁嚴重。後來知道係脷癌，要即刻切除癌細胞，條脷割咗一大半，講唔到嘢，食嘢都有困難，媽咪仲同我講：『第時講唔到對白添。』我同佢講健康最緊要，你乜都唔好諗。」說話至此，Sindy又再忍不住痛哭。

Sindy指母親患癌以來一直勇敢和堅強面對，她說：「佢今年7月17號做手術，做完手術之後身體好弱。媽咪好勇敢，割咗大半條脷之後重新適應講嘢，但傷口係咁流血水，跟住擴散到淋巴同個肺。」Sindy透露母親癌細胞急速擴散，但真正死因，仍有待驗屍報告。

廖麗麗由發現患舌癌到癌細胞擴散離世僅兩個月，不少圈中好友均感到極度突然和難過，薛家燕曾與廖麗麗拍過《皆大歡喜》等劇，對於廖麗麗突然離世，家燕姐昨表示：「我早幾月拍《燦爛的外母》時喺化妝間撞過佢拍第二套劇，我仲問佢有冇跳拉丁舞添，佢話『有！』見佢好精神冇乜嘢喎。佢係拉丁舞高手，所以keep到個身形咁弗，聽到呢個消息真係好愕然，大家真係要珍惜身邊人。」曾與廖麗麗合作多年的歐瑞偉昨說：「噚日接到消息，大家都好愕然，但唔知佢乜嘢病。」無綫昨對資深藝員廖麗麗離世表示深感惋惜，透露藝員科經已與其女兒緊密聯系，並盡力協助其家人辦理後事。

另外，香港資深音效大師曾景祥於上周四下午因肝癌在港離世，終年59歲，導演張同祖和製片人田啟文（田雞）同時證實其死訊。據悉早年曾景祥患上肝癌，曾做過手術，終因癌細胞擴散，撒手人寰。香港電影界均認同他是音效奇才，至今拿了8個香港電影金像獎和5個台灣金馬獎最佳音效獎。

曾景祥於加拿大溫尼伯大學接受教育，回港後在無綫當工程師，歷時數年，此外也曾擔任衛星電視的技術委員會顧問、香港會議展覽中心廣播設施顧問等職。於89年創辦Media Business Services Limited（MBS），為電影製作提供音效及後期製作等服務，亦是音效技術先行者，率先引進全亞洲最新的數碼音效技術，不少影圈中人都有起用他的製作公司做後期。跟他合作過的導演無數，計有徐克、周星馳、陳德森、劉偉強和爾冬陞等。製作過的電影包括《智取威虎山》、《頭文字D》、《無間道》《特務迷城》、《葉問》、《寒戰2》和《少林足球》等。

田雞指香港電影金像獎董事會已與曾景祥家人聯絡，盡量為其家人辦理身後事提供協助。問到是否定了喪禮日期？他表示：「冇咁快，我咃總會已經同佢家人聯絡咗，但要同佢家人開咗會先可以知道喪禮詳情。佢嘅離去係影壇好大損失，佢公司MBS有佢個女傳承落去，唔會有任何影響。」