【新增影片】
英超目前有好多出色前鋒，好似哈利卡尼、艾華路莫拉達同盧卡古狀態都好好，不過阿仙奴名宿亨利就覺得依家英超得一個世界級前鋒，並唔係前面提到嗰三個任何一個，而係今季喺射手榜暫時同莫拉達以及盧卡古一齊領先緊、加上過去喺英超已經有成就嘅曼城前鋒阿古路。

擔任足球評述嘅亨利喺《Sky Sports》節目度話︰「依家英超只有一個係世界級前鋒，就係阿古路，因為佢喺呢個聯賽年復一年都有好表現，佢贏過聯賽冠軍，而且喺度效力咗好長時間，應該獲得認可。我覺得有時我哋忽視咗阿古路。」

雖然曼聯嘅盧卡古同車路士嘅莫拉達暫時同阿古路都喺今季英超入咗六球，熱刺嘅哈利卡利過去兩季更榮膺英超神射手，但亨利認為「盧卡古啱啱先加盟曼聯，冇乜踢過歐聯，哈利卡尼上季踢歐聯亦好短時間，佢喺歐洲賽事冇乜成績，至於莫拉達喺皇家馬德里時期多數做後備，佢喺祖雲達斯嘅一季踢得唔錯，但佢係同泰維斯或者洛蘭迪拍檔。」亨利話好開心見到英超有呢啲球員，相信佢哋將來都會達到世界級。