現年36歲嘅韓國男星李準基，早前宣佈舉行亞洲巡迴粉絲見面會「2018-19 Lee Joongi Asia Tour 'Delight'」，是次見面會於本月15號喺首爾拉開序幕，李準基將於明年3月10號巡到香港亞博館冧港迷，不過同日亦有型男蘇志燮襲港舉辦粉絲見面會，到時兩位男星對撼鬥人氣。

相隔兩年再舉辦亞洲巡迴粉絲見面會，李準基喺首爾場時都使出渾身解數冧粉絲，勁歌熱舞逾20首歌曲，當中包括舞曲、搖滾風格、電音等，令現場氣氛高漲，同粉絲狂歡3小時。據悉李準基為咗縮短休息時間，仲刻意搬到練習室附近嘅宿舍，希望送上最好嘅演出畀粉絲，相當有心。

一向鍾意透過Instagram同粉絲溝通嘅李準基，日前完成日本場後，亦有喺Ig上載綵排花絮，又晒自拍派心，認真錫粉絲。而佢日前到新加坡參加頒獎典禮，獲頒「最佳亞洲男星」獎項，佢隨即於Ig晒獎並答謝粉絲。

精選韓流，喺晒《娛果》
http://fb.com/appledailyent