馬德鐘今日喺樂富出席活動，向大家宣揚關注前列腺癌教育。馬德鐘表示向來都有做身體檢查，但自己對前列腺癌認知不多，經過呢個活動，佢話除咗身體檢查外，仲會針對檢查前列腺：「飲食同運動好重要，我會食得好清淡，會食原形食物，因為好多人食齋，會將豆類製品整成肉嘅樣，製作過程加咗乜，我哋睇唔到，而運動方面，我會一星期做5次，但唔會好劇烈，都係游水同急步行。」問佢係咪同個仔一齊游？馬德鐘笑住話：「係呀，不過一落水就見唔到佢，因為大家目標唔同，我就健康游，佢就衝得好快。」

活動前，現場有唔少市民都搵馬德鐘合照，講到佢憑《跳躍生命線》入圍視帝同最受歡迎電視男角色，問佢係咪順便拉票？佢話：「又冇咁諗，今日嚟係推廣健康，好開心見到好多觀眾支持。」佢透露之後會再約《跳躍生命線》班演員一齊食飯慶祝收視：「大家咁用心做，每個收視點係觀眾對我哋嘅支持。」佢又指將會參與台慶頒獎典禮，但就冇太在意獎項得與失，仲話：「人哋攞獎都好開心。」

精選娛聞，喺晒《娛果》
http://fb.com/appledailyent