梁漢文喺今年1月涉酒駕被捕(相關新聞﹕ https://bit.ly/2F4UQ2o )，今日正式復工，喺邵氏影城為ViuTV主持遊戲節目「Good Night Show全民星戰」進行開鏡拜神儀式。

見梁漢文心情似乎未受影響，全程輕鬆，仲同拍檔林敏驄玩層層疊。對於下周判刑，梁漢文稱：「0依家做嘢盡量唔諗住，都冇乜點諗，其實都想借機會講聲，多謝關心我嘅朋友，唔好意思，要大家為我憂心，希望件事快啲過去。」

怕唔怕要坐監？佢表示：「冇諗過呢樣嘢住，希望盡快過去，事實上自己係做得唔啱。」佢指老闆任賢齊都有慰問佢，問到有冇叫佢生性啲？梁漢文話：「其實0依家好少出去，不過嗰日......我唔講咁多，因為唔方便講，呢件事之後，我受咗教訓，我可以應承大家會減到好少好少，嚴格到好似飛機師咁，就算飲一啖， 12個小時內都唔會掂架車，呢個係今次吸取到嘅教訓。」

有冇考慮過戒酒？佢話：「發生咗呢件事，我唔敢信口開河，因為0依家成日返大陸做嘢同應酬，我唔想不負責任，話自己以後唔飲，我會減到盡量少，監察自己。」佢又指太太為佢擔心，亦好多謝得到太太嘅諒解。提到梁漢文當晚折返酒店取車，係因為翌日要接載爸爸去醫院，梁漢文話：「爸爸知道，後來轉咗細佬車佢去。」

精選娛聞，喺晒《娛果》 http://fb.com/appledailyent