雨僑、林德信、錢國偉、「寸嘴Barbie」夏尉喻等，今晚到旺角出席《喜愛夜蒲3》慶功宴，電影上周四上映，截至6號票房已有520多萬，現場舉行儀式時，喺片中做配角嘅「寸嘴Barbie」，就企埋一邊，之前有傳佢每次出場時都性感示人，搶晒主角「峰」頭，所以就被禁宣傳。

而今晚通告原本冇佢個名，但最終佢亦現身喎，只見「寸嘴Barbie」繼續性感亮相，兼狂晒深長事業線，不過佢心情唔多靚，黑面之餘又藐嘴藐舌。

講到之前「被封殺」一事，寸嘴Barbie就話：「我唔清楚，導演叫我嚟就嚟，咁開心嘅事，想同大家enjoy成果，之前嘅傳聞係誤會，係監製導演想推高票房。」

佢又否認現場冇朋友，更強調佢哋全部都係好朋友。記者指佢係咪同其他人唔妥時，佢就話說：「唔係扮，係誤會，因為之前咁多新聞出嚟，自己冇即時解釋，0依家冇芥蒂，溝通好就好返，今日係公司安排嚟。」

係咪有人叫佢收口時？佢就支吾以對：「我之前唔識表達，0依家識得講，同識啲措詞，會小心講嘢，可能講冇心，聽有意，自己有檢討過，要學習，希望做得更加好。」記者指佢係想認錯時，佢又答非所問：「感恩，有機會同佢哋傾偈同談心。」佢又話自己冇藐嘴藐舌，指自己掛住睇海報喎。