新一屆港姐首輪面試日前就喺將軍澳舉行，每次選美都有唔少對娛圈死心不息好有興趣嘅女子參加，仲有唔少未入圍就已經被人起底新聞多多，好似前年參加過ViuTV《美選D.n.A》嘅湯沛宜（Toto）就再接再厲，佢同傳媒講鍾意選美舞台，參選都係平常心，唔怕自己參加過ViuTV節目而有弱勢。（新聞連結： https://bit.ly/2zoZINY ）

其實，Toto都真係對娛圈好有興趣，有不到黃河心不死嘅決心，佢被李霖恩簽咗做旗下藝人，又做過舞台劇，同黃榕參加過健美小姐，都算係踏咗半隻腳入行，不過今日就有讀者爆料，指佢曾整容，割雙眼皮、下巴打咗嘢同有抽脂隆胸等，仲話佢未做模特兒前，曾經喺唔少中環夜場做公關工作，化名叫Holiday，質疑佢「個底花晒」都可以去參加選美。

《蘋果》就搵過Toto，問到有關負面指控，對於被指整容，佢就否認，解釋以前自己係「肥底」：「我以前肥嗰時，係130磅，36D上圍，減咗肥，o依家上圍仲細咗，得返34E，我嗰胸不嬲都係咁大。講到我個樣變咗，咁我係瘦咗，減肥收咗水，輪廓咪瘦咗，我係有去做醫療美容，好似補濕水光槍、RF射頻，輪廓咪冇以前咁包包面，眼同下巴都係可以做機『碌』得大啲尖啲，呢個係有，但整容我係冇做過。」

至於講到佢曾做夜場公關，佢就再強烈否認，從未有過叫Holiday呢個英文名：「報料人應該都唔係咁鍾意我，我之前選ViuTV都預咗有人會評擊，坦白講，我喺有同朋友去clubbing，佢哋邀請我去啲高級私人會所，係一大班朋友慶祝聯誼個隻，等於你哋去唱karaoke咁，不過我啲朋友就鍾意去呢啲會所。」Toto就再強調同朋友去聯誼，絕對唔係工作，當中亦冇金錢涉及：「女仔有嘢就畀人咁講，唔會因為咁，唔同朋友交往，呢啲係正常社交，自己冇做過陪酒工作。」

精選娛聞，喺晒《娛果》
http://fb.com/appledailyent