以下係初生之犢與股壇老手嘅對白︰
初︰初生之犢　股：股壇老手
初︰「我想7毫子買隻神仙股呀，博佢炒鑊甘。」
股：「但隻嘢向下炒緊喎，就算俾你買到都唔知幾時先會炒喎，不如留番啲錢抽iBond。」
初︰「抽iBond唔使錢。」
股：「你用孖展抽都要畀錢坐貨。」
初︰「iBond第一日沽就得啦！」
股：「……」
近期股市極度難玩，大家都抱住搵快錢嘅心態做投資（其實係投機），可惜成交乾過我荷包，贏幾格變成高難度動作，相反輸幾格（或更多）就易過借火。有人話發達容易搵食難，扑中消息股隨時贏大鑊，唐牛唔否認消息股依然有市場，但最近細價股炒風只得一日貨仔，同以往連續幾日大成交再完美派貨，完全冇得比， 連莊家都急功近利，我等散戶要發達？難矣！

信佳破旗繼續坐定定

簡單跟進一下近期推介︰佳寧娜（126）、信佳（912）先後公佈業績，前者已喘穩，分拆事宜未叫停，可繼續留意；後者大成交破旗炒上，見二字頭難度不大。富智康（2038）盈喜開口中，噚日好消息出貨格，撈得過！
世界盃最後一輪分組賽今晚上演，德國同美國和波即可雙雙出線，難怪和波賠率只得2.57倍，美國領隊奇連士文乃德國名宿，關係如此千絲萬縷，就算冇肉食都要買和！

唐牛
https://www.facebook.com/tongcow88