愛國有好多唔同嘅演繹方法，有人會掛喺口唇邊，有人會寫喺紙上，理工大學就選擇將愛國情懷放喺運動場上，仲創咗一項世界紀錄。理大噚日成功號召咗2.1萬名學生、市民同童軍齊集小西灣運動場，用血肉之軀喺草地上砌出一幅有成個足球場咁大嘅國旗同特區區旗。呢個名為「和諧團結創『旗』蹟」嘅活動，除咗要向人表明佢哋愛國愛到出晒面之外，仲係大學70周年校慶活動重頭戲之一。
一班歌星好似關智斌、傅穎都有出席，不過最受歡迎嘅，反而係理大校友、參加過《殘酷一叮》嘅搞笑組合爆炸猛男PHD。理大校長潘宗光話，呢個活動足足為大學同慈善團體籌到300萬。愛國愛到寫入世界紀錄，理大呢鋪真係玩得大。