李蕙敏今日去到商台繼續宣傳新歌，自從07年開始，佢開始自資做新歌，再夥拍唱片公司宣傳派台，佢話：「自由度高，加上舊唱片公司又好好，將啲舊版權歌曲加埋新歌推出新曲加精選，不過我都覺得要做多啲新歌。」大陸同澳門等地都一直有洽談開騷，可惜有啲條款或時間問題未傾成。

平日愛入廚嘅李蕙敏笑指老公係白老鼠，不時要試食佢學烹飪節目煮嘅中西菜式，佢笑指未試過令老公食得辛苦外，仲令老公發福唔少，只係愛美老公唔認發福，佢話：「我剩係唔整甜品，因為想食得健康啲，有時禮拜日我哋喺屋企，老公會整早餐我食，兩隻太陽蛋加焗蕃茄，我好鍾意食蕃茄，佢成日笑我遲早變大蕃茄。」