多仔公陳浩民五年抱四，佢同老婆蔣麗莎嘅第四胎囡囡明日出世，今晚佢陪老婆到銅鑼灣聖保祿醫院，準備明早開刀生B女。

大約6點幾，陳浩民兩公婆現身醫院，帶同兩個袋、一個中喼，一盒汽球玩具、BB籃同鮮花，好大陣象。肚大如籮嘅蔣麗莎話：「玩具係送畀哥哥同姐姐，明天佢哋嚟探BB。」陳浩民話今晚會留醫院陪老婆，會布置吓產房，有啲嘢可以做吓。

問到心情？蔣麗莎望住老公話：「最怕佢趕唔切返嚟。」陳浩民解釋之前喺內地拍戲，今日匆匆趕返嚟，明天老婆生完又要上去開工，趕唔切接老婆出院。蔣麗莎話：「我要佢剪臍帶，呼籲可以畀佢放多啲假。明天開刀唔係擇日，係聽醫生意見。」第四任老竇陳浩民話：「屋企幾個成員都係30號生日，老婆同大女都係11月30，細女係3月30星期三，又係第三個女，全部都係三。」

係咪好開心？陳浩民笑笑話：「慣咗，不過都緊張同興奮，又多一名，緊張係始終入產房，壓力幾大，因為自己飲藥水都腳仔軟，老婆好勇敢。」蔣麗莎就笑言：「都幾驚，生第一次都唔知乜事，第二次知道吓，第三次都好熟，第四次自己可以做醫生。」陳浩民即大讚：「勇者無懼！」

問到BB改名未？蔣麗莎說：「未，乳名叫LuLu，係大女改嘅。」陳浩民話有次問佢哋想妹妹叫乜名，大女話叫LuLu：「我都打個突，當LuLu好啦，唔好當佢臭四，因為佢排第四。」會唔會追第五個？佢話生完再講。至於話佢買二千萬豪宅，陳浩民就買咗都未收樓。