當年今日

  蔡瑩璧上任第一天 - 李八方

蘋果日報 2002/01/08 00:00


「肥陳」陳鎮源噚日終於告別政府新聞處到漁農自然護理署上班,八方當然提佢有好去處有靚相唔好忘記通知一聲。接掌新聞處帥印嘅係出名拼搏嘅蔡瑩璧,佢出身工商系統,當然見過世面,曾派駐日內瓦,「九一一」事件發生時,佢剛好喺波士頓嘅哈佛大學進修,但係Yvonne蔡就唔係好驚,佢重話「生死有命」,唔驚得咁多。
蔡小姐噚日第一日返新工,又唔係做開嘅範疇,佢叫大家要多多包容,畀時間佢熟悉一吓。於是八方問佢點睇香港啲傳媒,蔡小姐話印象好好,冇乜唔如意經驗,只係班行家成日轉工,唔知邊個打邊個。
八方諗,「肥陳」一定畀咗唔少錦囊蔡小姐,所以佢猛話要加強同傳媒溝通,響應老董號召,要更掌握民情。至於最近呢單警察與練同學事件點睇?蔡小姐就話𠵱家調查緊,警方都係低調好啲,肥陳講笑咁話以後不如講「恭喜發財」,咁就可能唔會出事。
(圖)左起:陳鎮源、蔡瑩璧


E-mail:[email protected]