港人的氣質跟港股特色，每每如出一轍。不管閣下同意否，跟紅頂白者多，雪中送炭者少，暴力與抗爭，除了可洩一時之憤，不見得可取得任何正面效果。火滾完，氣下了，眼見滿目瘡痍，才知闖了大禍，一切已恨錯難返，香港盛產叻仔，卻越來越令人恨鐵不成鋼。

正如高鐵工程申請追加撥款事件中，有人認為高鐵是大白象，指香港根本不需要高鐵。記得廿多年前的玫瑰園計劃，幾多井底之蛙一樣罵新機場是大白象，現在還有誰敢說這句話！

高鐵工程背後牽涉5,000名建築工人及2,000名工程師生計，及他們家人的福祉。一句反對，堅持拉布，影響之深遠又豈是事事只聚焦意氣之爭者可預計得到。

為了阻止已完成的七成半工程被餘下的四分一拖垮，港鐵（066）主席已表示，高鐵有兩個掣，一個黃掣、一個紅掣。截至上月底，財委會仍未有決定，仍在拉布，局長亦只好㩒黃掣，做好㩒紅掣，即係停工的準備。如此龐大工程當然無可能話停就停，要跟承建商商量，假如安排欠妥善，例如有支架工程只完成到一半，未做完就停，好可能很快就會倒塌。

工程突然停工，7,000名工人即時手停口停，市民仲要無啦啦畀多幾十、甚至百幾億，咁邊個負責呢？局長要問責、港鐵要問責，咁議員要不要問責？

如果工程真係爛尾，唔知泛民議員有沒有勇氣同西九龍嘅選民講，我哋幫大家成功爭取咗……一個大窿！西九龍總站四周嘅交通改道，亦都唔知幾時先可以復原。

掌握財經生活資訊，即Like「蘋果ATM」fb專頁啦！
http://fb.com/appledailyatm