龔嘉欣同傅嘉莉（Kelly），今日喺灣仔出席鐘表展活動，嘉欣正拍攝劇集《殺手》，辛苦狂操又要剷青，佢仲話平時上圍谷得太勁兼露馬甲線，難得今日扮靚靚，選擇真空上陣兼戴假髮，佢話：「因為拍劇好辛苦，平時上身只係着bra，谷得好辛苦，日日要谷，夜晚都冇得食飯，今日咁難得，真空高貴啲。o依家我走另一路線，騷老鼠仔、腹肌同馬甲線。」

嘉欣仲話接得套劇就要去到盡，但就因為好多打鬥場面，搞到周身傷，佢話：「傷得好嚴重，怕嚇親大家，其實我要向祥哥（黎耀祥）講對唔住，我哋成日要打，成日都打親佢。」問佢有冇打中對方「男人最痛」重要部位？嘉欣話：「未，其實個角色專攻男人重要部位，佢已經攝咗嘢，佢好好，成日叫我放膽打。」

另外，Kelly話最近因有份演嘅《特技人》播出，帶挈佢多咗好多工作機會，佢話：「當我好攰嘅時候，就會打開銀行戶口睇，o依家都有賺咗6位數字，好開心，我嘅願望係可以儲錢買樓，但都鍾意買珠寶首飾，因為可以戴之餘又保值。」Kelly又透露嚟緊會同關楚耀以螢幕情侶檔搵銀，一齊行騷。

精選娛聞，喺晒《娛果》
http://fb.com/appledailyent