馮仁昭四圍超：華仔獵鷹伴虎 - 馮仁昭
蘋果日報 2014/03/24 00:00
劉德華一向同動物有緣，早年佢同張曼玉喺電影《戰神傳說》跟海洋公園嘅殺人鯨海威小姐合作，後來又同馬騮、企鵝、斑馬、長頸鹿、豹BB同獅子BB為代言嘅道地飲品拍廣告。最近華仔拍最新一輯飲品廣告，再同動物合作，今次係大老虎同鷹，隻老虎嚟自泰國中部叫Tony，隻鷹叫Jaa Jaa，華仔82年拍電視劇《獵鷹》走紅，而鷹鼻係華仔標記，所以鷹對華仔嚟講，應該份外有親切感。
劉德華近排幫代言飲品拍新一輯廣告，出動到大老虎同飛鷹。
自行幻想入戲
為安全起見，華仔冇同Tony及Jaa Jaa同場一齊拍，只係用電腦效果key埋一齊。當日佢嘅戲份喺室內廠景完成，為製造同場效果，全廠鋪上綠布方便後期製作，華仔要喺自行幻想情形下，分別做出投擲、喪跑、跳躍同搶奪嘅動作，導演為幫助華仔入戲，特登喺廠放咗多款Tony同Jaa Jaa唔同造型嘅相出嚟。雖然冇對手，但華仔一向要求嚴謹，結果前後花咗兩日先至完成。至於Tony同Jaa Jaa戲份就喺泰國完成，工作人員掛起大型綠布，喺指導員指示下Tony同Jaa Jaa做出唔同形態，前後亦花咗幾日。
撰文：馮仁昭
撰文：馮仁昭
由於係用電腦效果key埋一齊，華仔惟有喺廠對住空氣做戲。