有政界及法律界中人不約而同稱，政界及法律界一直流傳，梁當日知悉青年新政梁頌恆、游蕙禎宣誓時提及港獨及支那，其實並非感到憂慮，「有傳聞話，當日CY睇到梁、游咁宣誓，覺得可以做嘢，完全唔係嗰種驚辣㷫中央，唔知點收科嘅心態」。
另一法律界人士說，圈中盛傳袁除了認為不用釋法解決今次風波，亦曾勸梁不用以個人身份入稟，就梁、游宣誓提司法覆核，「傳聞話袁勸咗梁幾次，司法覆核等政府提就得，唔需要特首再提，但梁振英堅持要咁做」，該法律界中人直言，梁如此做明顯為「領功」，「畀中央睇佢身先士卒打港獨，咁對佢連任又可以加分」。
至於中央堅持釋法，雖說主動權在北京強硬派手上，但有政界中人指他收到消息，梁在過程中肯定有推波助瀾，「有法律界人話，之前大律師公會上京，中央官員仲未覺得要釋法，但之後單嘢越搞越大，有傳梁振英都有份火上加油、同中央講形勢有幾嚴峻」。他指梁及西環一直為北京強硬派推動釋法提供柴火，「所以如果梁振英話佢都唔想釋法，根本就係呃人，就算佢冇直接出聲叫中央做，都有從中推波助瀾」。
季陶
周一、三、五刊出