唐文龍今日去柴灣錄影ViuTV錄影《晚吹--總有一隻喺左近》，講到前度陳少霞成功標尾會，同「中國法拉利之父」之稱嘅李文輝閃婚(新聞連結： http://bit.ly/2ayPhWp )，唐文龍話當然戥佢開心啦！

問佢有冇同前女友陳少霞聯絡？唐文龍話：「呢幾年有撞番，有加微信，大家係朋友嘅溝通，我戥佢開心(陳少霞嫁法拉利之父李文輝)，佢另一半好有型，又有靚車揸，好事。」講到當年雖然同陳少霞分手，但唐文龍對舊愛依然照顧有加，佢話：「我唔係一個曳人，一直以嚟，我哋關係好，我除咗之前嗰個女朋友，我要下世還俾佢之外，我諗我冇對任何一個女人唔住，除咗我阿媽，生我咁辛苦，我仲未有機會報答佢，所以同我過一齊啲女朋友，我冇對佢哋有任何虧欠，早排行雷閃電我都可以出街，我都唔驚。」

講到工作方面，佢指大部份時間都喺大陸拍劇，佢話：「我返咗香港兩年，香港電影圈我都有參與，不過冇我想像中多，我都要搵食，所以兩邊走。」提到奇洛李維斯處男執導《太極俠》，唐文龍當時有份參與，問佢有冇機會再拍荷李活電影？佢話：「嗰次係巧合，可遇不可求，其實年頭都想去羅省住半年，但我朋友話不如搵人幫手探探路，冇門路就冇人踩你。」識奇洛李維斯喎，仲話奇洛李維斯「點燈」要同佢食飯，唐文龍聽到即話：「唔好咁講，我拍佢嘅戲啫，大家一齊食飯啫，唔好講『點燈』，我高攀唔起。」