國慶賽馬日篇文一出街，就有老友恭喜我，仲祝我好好成績，多謝你哋咁支持。

咁當然係未如理想，畢竟頭關就斷，後面熱Win就算彈甩贏都補唔番，更何況係險勝。

至弊，仲有人cap（截）圖改我grammar（文法），話我漏咗「但係」呢個連撞詞，叫我好好改善一下。（中文係咪應該都用「文法」呢個詞語？）

大佬，我都已經唔夠瞓兼又暈又火滾，唔打算檢討啲其實已經完全唔緊要嘅嘢。

脾氣都未得閒發，就已經又要交稿：跑完、唔瞓、即刨都係得19個鐘頭去起貨，未計我可能要搭車、食飯、大小二便......時間所限。

我睇好今晚第四場隻「勁飛勁」，上仗馬兒表現亮眼，惟鞍上人表現差強人意，令到尾800米起碼打個九折！

呢隻馬我存咗檔，換東東（巫顯東）即刻圈起，少五磅，正！冇跌磅，正！少快馬，非常好！

原來就係，而家個9檔都有啲頭痕，盡力而為唔好三叠見，否則又係一殼眼淚。

冇乜操喎……無所謂啦！佢冇咁興奮，都係好事，始終百厭啲，比較容易失控。

當安慰自己，咁都叫做換番些少好賠率，跑到P入到Q都好分啲啲。如果真係要拖，咁1、2、5、10都好似幾好喎！係本大利小，唔使預我。