當年今日

行超市:
city'super台灣美食節買地道食品兼抽獎

蘋果日報 2002/07/27 08:00


只要喺台灣美食節期間購物滿$300,即可獲贈抽獎券一張,贏取獎品,獎品包括:
1.長榮客艙機票來回台北兩張,名額一名。
2.city'super禮品儲值卡$300,共四名。
3.鳳梨酥禮盒,合共24盒。
醒神類
新鮮菠蘿冰條
台灣盛產菠蘿,所以今次台灣美食節又點可以無佢份呢!大熱天時,嫌食冰沙或雪糕解暑無咁有益,咁呢款以新鮮菠蘿做成嘅冰條,絕對係至佳之選,凍冰冰再加上酸甜嘅味道,食完包保大家暑氣全消,其他地方絕對食唔到㗎,$8一條,另一款加多咗冰糖嘅新鮮菠蘿冰條,略貴少少,每條$12。
$8及$12條
水果醋飲酸甜夾集$5樽
飲用果醋已成潮流,其味酸甜夾集,醒胃又醒神,更有助消化㖭!圖中呢三款醋飲,包裝精美,顏色鮮豔,飲完個樽重可以載水循環再用。有三種口味:梅子味、雜果味及檸檬味,每樽280毫升。
粉麫類
敍攤炒麵送茶包
呢款炒麵或者可以帶畀大家另一新驚喜,同樣只需要注入滾水,待麵熟咗,倒去水份後,再拌入調味醬包撈勻就食得,麵質爽口彈牙,調味醬又夠香濃惹味。有包裝及碗裝,兩者同時隨麵都附送一包茶包在內,食完炒麵,重可以即時歎番杯茶㖭!
敍攤沙茶牛肉炒麵$9碗
敍攤辣子雞丁炒麵$5.5包
米粉拉麵人手製造
米粉係台灣省新竹市嘅特產,歷史悠久,全部由人手製造,米粉幼細如絲,口感滑溜,老少都啱食,炒、放湯或打邊爐都啱。關廟拉麵是台南特產,一包有兩個麵餅,同樣以人手製造,絕無添加防腐劑成份,麵質口感獨特,爽口彈牙,久煮亦唔易爛。
新竹米粉$10包(左)
關廟拉麵$13包(右)
冰品類
有機豆奶冰淇淋
講求健康嘅人士,必要試試呢款有機豆奶冰淇淋。呢款消暑良品以有機黃豆、砂糖、麥芽糖、椰子糖等所做成,不含奶成份,天然健康,對奶有敏感都會啱食。有機豆奶冰淇淋賣相近似一磚豆腐,入口滑而透心涼,有原味豆腐及芝麻豆腐兩種口味。
$13盒
福爾摩沙消暑良品
以果汁和刨冰製成嘅冰沙,係夏日至佳消暑良品。有兩種口味,分別係荔枝冰沙及芒果冰沙,前者清香,後者則有香濃嘅芒果清甜味,配以冰同食,入口即溶,好爽。
$10杯
醬油類
火鍋蘸肉撈沙律三種混醬
呢三款係台灣出品嘅日式醬料。壽喜燒係一款地道日式火鍋醬,以柴魚、昆布、鹽、醋、醬油等成份所做,成份天然,不含人造色素或添加劑。芝麻沙拉醬則用途廣泛,除咗可以拌蔬菜做沙律外,亦可作為蘸肉食,甚至作為麻醬拌粉麵食用又得。燒肉料理醬亦係一種富日本風味嘅醬油,主要用作蘸肉,以增添肉嘅鮮味,但又唔會搶走肉嘅原來肉質味,非常好用。
壽喜燒(左) $36樽
芝麻沙拉醬(中) $36樽
燒肉料理醬(右) $36樽
特製肉燥醬味香濃
肉燥醬係台另一特產,以古法煉製而成,主要用料有濃縮豬骨汁、多種香辛料、調味料、精製紅葱頭等,肉燥醬用途廣,拌飯拌菜,甚至加入湯圓內做成鹹食法亦相當不俗。
$59樽
其他精選
地道炸球即場製作
想即時品嘗到台灣風味食品,就要試即場嘅炸物,包括甜食嘅紅豆球、炸芝麻球、黃金球,分別係紅豆餡、芝麻餡及芋頭餡,全部$12,有十粒;亦有鹹食海鮮串燒,如龍蝦棒、鮪魚燒等,$10串。
$12
台南油飯十分鐘食得
呢款油飯係方便即食飯,只要取出盒內嘅飯包,放入滾水內烚約10分鐘即食得,又或放微波爐高溫加熱亦可。油飯係以糯米做飯,入口煙韌甘香,又以豬肉、魷魚、香菇、蝦、葱等做餸,飯味香餸菜多。
$12盒