35歲中泰混血兒「阿順」去年10月26日駕駛電動滑板車（電板）時發生意外，在將軍澳日出康城對開單車徑頭部着地，留院4日後傷重死亡，成為本港首名駕駛電動滑板車時喪命的人。其泰裔高齡母親嘆稱，自己早前因腳患回泰國醫病，驚悉兒子出事後馬上趕回香港，惜見到愛兒在病床上已無知覺，不久更天人永隔。阿順母親悲嘆愛兒生前極孝順，卻不幸離世。她含淚表示會「會好好照顧自己」，免在天國的孩兒擔心。阿順的女友則至今仍未走出傷痛，她與愛郎的母親均促請當局監管電板，包括考慮強制玩者戴頭盔，希望可避免悲劇重演。

記者：黃麗英 梁德聰

「阿仔好孝順，可惜無端端就死咗。」年屆71歲的順母憶起兒子，不禁潸然淚下。阿順父親是港人，祖籍潮州，20年前去世，阿順及胞弟由泰裔母親獨力撫養成人。阿順中學畢業便工作養家，生前做銀行速遞員。母親眼中的阿順為人乖巧孝順，與初戀女友及母親同住將軍澳，放假不時用輪椅推行動不便的母親出外用膳，每月給母親4位數字零用錢。

阿順去世後，家中只餘下兩個女人，順母不想加重「兒媳」負擔，堅強地表示：「佢唔使照顧我，我會自己照顧自己。」為兌現這句說話，長久被腳痛纏擾的她，每隔幾天一拐一拐到附近超市，一次買幾天的餸菜來煮飯，照顧好自己三餐。

阿順與女友梁小姐是中學同學，兩人皆為對方初戀，中二牽手至今相戀廿載，可惜一次意外令愛侶天人永隔。梁小姐至今仍未走出傷痛，頓感前路茫茫，惟有靠工作麻醉自己，「返工唔諗就冇嘢，一諗起就有嘢，見步行步，都冇辦法，佢都返唔到生」。阿順去世後，留下5隻鸚鵡、3隻小狗以及一缸珊瑚。飼養寵物的重擔落在梁小姐身上，雖朋友曾表示可幫忙領養，但遭她婉拒，「我唔捨得，養咗咁多年，冇辦法先再算。」

梁小姐憶述，事發當晚10時許，阿順外出到將軍澳單車徑 「玩車」，約1小時後意外撞向一架共享單車，頭部着地受傷送院。梁小姐於凌晨12時許致電阿順，不料獲警方通知噩耗，而現場只有阿順及單車手，未找到其他目擊證人，意外後共享單車車尾位置變形，而滑板車完好無缺，警方根據單車手口供及表面證據，初步推測是阿順撞向單車，原打算控告阿順無牌駕駛等多條罪名，但隨着阿順留醫4日後離世，追究刑責變得無意義。

梁小姐嘆稱，阿順愛新奇、刺激的玩意，事發前兩個多月才在網上購買電動滑板車，曾經出行數次。梁小姐曾目睹他試玩，感覺阿順操作純熟，但見到他玩電板時全無保護裝備，而且速度「快過普通單車」，曾提醒他要注意安全及佩戴頭盔，但遭男友以「玩嗰啲人個個都唔戴」為由拒絕，未料最終竟發生致命意外。

梁又指，男友知道在港駕駛電動滑板車屬違法，所以特意冒險在夜深人靜時出動。「佢梗係知唔玩得啦，夜晚先去就係咁嘅原因，啲人個個都係夜晚先去玩。」然而，黑夜奔馳遠較日間危險，阿順最終喪命。

「你畀人玩多啲就死多啲，係咪政府鍾意呀？」順母哀怨，愛兒阿順成為香港電動滑板車意外中的第一個亡魂，一個多月後大埔再發生一宗同類奪命意外。阿順的女友及母親皆認為高速的電板十分危險，兩女異口同聲呼籲市民注意安全，不要高速駕駛，亦希望政府可以更新現行有關於電動可移動工具「准買不准用」的法例規定。選擇一是全面禁售，選擇二是立法監管及訂立詳細的安全要求，例如規管玩者必須佩戴頭盔以保障生命安全。「好似電單車咁，戴晒頭盔咪安全啲囉；如果撞到個頭，有咩事死梗架。」梁小姐傷心地說。
-----------------------------
【匿名港警爆大鑊】
韓國KBS時事節目《時事直擊：香港 被自殺》
一按即睇
-----------------------------
【撐學生】
召集有心人 撐學生全年睇《蘋果》
立即按此
-----------------------------
你敢爆，我敢獎！ 立即WhatsApp《蘋果》24小時爆相爆片熱線 或致電：63836568