【客串當玩吓】譚炳文曾嘆年紀大唔捱得:行得走得咪做吓囉
譚炳文配音界七擒七縱七色狼
縱橫影視、配音界逾半世紀,一代「配音王」譚炳文今早因肺癌離世,享年86歲。炳哥生前醉心演藝事業,50年代開始當播音員,做配音的工作,在1969年加入無線工作,拍了過百部電影和電視劇,同時為中、日、韓、美劇,以及動畫片配音,為了紀念炳哥對演藝界的貢獻,無綫今日在網上重播在2018年的訪問節目《你是你本身的傳奇.當年相戀譚炳文》。
炳哥在訪問中提到在1964年開始拍電影,首部作品是《改造小姐》,他表示《改》是從廣播劇改編:「嗰陣《改》係麗的呼聲嘅廣播劇,係長篇廣播劇,播出街之後相當受歡迎,好多聽眾鍾意聽,嗰陣如果啲廣播劇受歡迎,啲製片家就會買版權嚟播,佢哋仲出吓綽頭,用番原班人馬嚟拍,問我哋拍唔拍,有錢搵點解唔搵?咪就梗係拍喇,所以第一套咪拍咗《改造小姐》,其他全部都係播音明星。」到了1970年,炳哥投資拍《七擒七縱七色狼》,一嚐做老闆的滋味:「因為之前拍咗狄娜好多套戲,嗰陣諗吓,一咪同人拍劇賺錢,不如自己都搞一套賺吓錢呀,嗰陣啲片好收得,導演楊權咪話諗吓喇,大家飲茶嗰陣度吓橋,咪諗咗《七》,之後搵番周吉、高魯泉成班諧星一齊做,狄娜擔正,嗰陣好多男人鍾意睇佢,首席艷旦。」
言談間炳哥亦提到好拍檔李香琴:「嗰陣佢好紅,叫『菲林琴』,因為有菲林嘅地方就必有佢,之後佢入咗麗的映聲做嘢,蔡和平好想搵佢做《歡樂今宵》,問我同佢熟唔熟,我話熟咪約咗佢出嚟,同蔡和平傾好晒合約,咪過咗嚟TVB。我哋一齊做拍檔,拍《大郷里》,嗰陣真係好收得,啲觀眾幾乎連飯都唔食走去睇。」炳哥還說:「佢係一個工作狂,好顧家,乜嘢工作都唔推,就算幾辛苦都好,都會捱,佢之有今日都係捱出病,嗰陣佢拍緊TVB兩套劇,一套都好辛苦,仲要拍兩套,跟住又接咗電影話要去橫店,返嚟第二朝又要趕住拍劇,咁咪就病囉。」
提到拍劇,炳哥表示自己拍了很多劇,數目多到自己都忘記了:「以前拍劇好快手,好似杜琪峯做導演,《京華春夢》一場戲10幾頁紙,佢可以拍到2點零鐘,已經拍咗12、13場戲,好快手,圍讀一次,試位,take one、ok 補鏡,咁就一場,而家啲唔敢講,而家啲導演好叻,拍出嚟好靚,但係時間好長。而家年紀大唔捱得,有時咪客串做吓1、2場戲,當係玩吓,做人係咁,到咁上下就會知道,我哋而家年年唔同,今年做得,或者下年都未必做得,而家行得走得咪做吓囉。」
至於配音工作,炳哥說:「初初喺麗的呼聲做廣播劇配音員,第一套喺電視出嘅英文配音片係希治閣《金毛虎》,尤伯連納啲廣告全部都係我配,卡通片有,配過《IQ博士》做大王,最深刻印象係做《包青天》,以前嗰啲會叫我做師傅,而家都會約我食飯。」
無綫今日重播炳哥在2018年的訪問節目。(無綫影片截圖)
炳哥表示自己出過30多張黑膠碟,有好多歌,不過唸得出只係得10首歌左右。
-----------------------------
-----------------------------
《本土情味》結集《飲食男女》雜誌經典欄目「老字號」文章,記錄香港40家飲食老店的動人故事,見證香港飲食史的甜酸苦辣。即日起,於各大便利店及書報攤有售,並於
《蘋果日報》你的優惠 網上獨家發售!