江若琳慶祝入行十周年一連兩場嘅《我只不過是江若琳演唱會》嘅騷噚晚完結，一班圈中好友都有出現，江若琳唱《Show You》嗰陣仲請咗鍾舒漫、吳若希、張紋嘉上台，佢哋仲一齊跳舞。其間江若琳講咗佢自己嘅經歷，佢話：「之前返大陸拍劇，好多人話劇組啲飯好難食！但係我覺得好食，因為有劇組飯食，等如有工開。」

噚晚嘅嘉賓，係江若琳心中嘅天使周慧敏，佢哋一齊唱《孤單的心痛》，江若琳話周慧敏姐姐嘅歌佢全部識唱，可以同台唱歌就好似發夢咁，周慧敏台上面話：「可以分享十周年快樂，佢打俾我，我揀咩歌佢都識唱，連新歌都識，佢係一直好留意我嘅歌。」江若琳就話：「細細個聽佢歌大，周慧敏姐姐係好錫我嘅人，我有任何困難佢都會幫我，當全世界唔信我，誤解我，嗰時我都未識佢，佢都透過司機話我知佢信我，當一個女神咁樣同我講，對我來講係一個好大嘅力量。」江若琳話多謝呢位生命中嘅天使：「多謝你，我愛你，周慧敏！」呢一刻場面溫馨。但係轉頭周慧敏又催婚話：「下次唔知係咩日子，唔知我可唔可以同你分享，大家都想你做生煎包王子妃，不過，我覺得最緊要你幸福快樂。」

兩場騷江若琳男友蕭潤邦（Oscar）都有上台同佢跳舞，尾場Oscar仲忍唔住錫咗江若琳一啖，完騷後，江若琳被追問點解只係錫額頭，唔係咀嘴，佢含笑話原先連錫額頭都冇：「呢個係佢自己加㗎，頭先我都嚇一跳，綵排嘅時候都係諗住跳完就拖手離開，噚晚佢攬攬我嘅時候都覺得幾冧，佢可能今日mood到，就有情深的一吻。」講到偶像周慧敏催婚，佢話結婚一定通知大家，但係未有咁快，Oscar都未有求婚，佢話一切隨緣：「大家都係向嗰個方向出發，唔會話太急嘅，同埋我係女仔嚟，都要睇男仔幾時行動。」