出得嚟行，預咗要還；既然狼振英堅持要搵唔夠班嘅人做局長，就唔怪得人哋冷嘲熱諷！不時寸爆狼振英嘅全國政協常委何柱國，對狼英班子亦唔多順眼，噚日將火頭燒至發展局局長陳茂波，唔單止將謬波降格做房屋署署長，仲扮唔記得佢個名，只記得佢做劏房囉！

早已話過狼英做特首唔掂嘅煙仔何，噚日投票選完港區人大代表後，一臉風騷咁行出會展。記者乘勢而上，問佢點睇狼英推出嘅買家印花稅呢？點知煙仔何轉移視線借題發揮，反問記者：「嗰個房屋署署長叫咩名？咩波？花名叫咩名？叫波叔呀？人哋做劏房㗎﹗」擺明唔妥陳茂波。

謬波被「降級」變署長

查實謬波上任近半年，新聞一籮籮；煙仔何仲未記得佢個名，係真唔係呀？但呢頭唔知人個名，嗰頭又記得人哋做劏房喎，認真矛盾囉！八方都明白，唔少市民都覺得，謬波未去到局長level，但煙仔何都唔使私自將佢降級做署長㗎，人哋名正言順係局長嚟㗎，咁講人哋好瘀㗎嘛。
煙仔何仲未寸夠皮，之後謙稱唔識買家印花稅呢啲嘢；應唔應該推落去，就梗係「搞掂屋宇署先啦！」屋宇署家俾人話厚梁薄唐喎；呢個「建議」，係咪好發人深省呢？
講反話似乎亦係煙仔何長處。記者問佢狼振英做唔做得足五年任期，佢竟然話：「十年」，原因係「我見你哋咁支持佢，點會做唔到十年？」唔通係諷刺港人仲未清醒？

mailto:[email protected]