【新增內容及圖片】

韓國天團BIGBANG嘅成員太陽上月娶初戀演員女友閔孝琳，太陽將於香港時間今日下午1時喺江原道鐵原郡第6師團青星新兵教育隊現役入伍，並會接受為期5周嘅基礎軍事訓練，太陽喺訓練所嘅新兵號碼為77號，訓練後再分配到部隊。而太陽噚日已喺Instagram上載咗佢嘅平頭裝新look。

而大約喺香港時間1時前，穿上黑色厚褸兼戴上黑色口罩及黑色冷帽嘅太陽現身訓練所，太陽出名愛錫粉絲，所以佢都好貼心咁有喺現場同粉絲揮手道別，見佢心情大好，仲跪喺地上同粉絲行大禮，之後又做出敬禮手勢。不過現場就唔見太太閔孝琳，估計閔孝琳已秘密抵達現場。

另外，太陽嘅演員哥哥東賢裴喺弟弟入伍後，就喺Instagram上載咗兩張太陽喺屋企出發前嘅相，兩兄弟更攬到實一實，東賢裴亦留言寫道：「親愛嘅弟弟，好去好回，我哋屋企由我嚟守護，見到你咁堅強嘅一面點解我會想喊？要小心唔好受傷，我好愛你。」

更多韓流，喺晒《娛果》
http://fb.com/appledailyent