禮拜六沙田八草兩泥賽事，草地用最狹窄之C加3跑道，睇番最近4月16日同一移欄八場賽事，當中七場有一至三檔馬勝出或入Q，內檔優勢好明顯。跑法方面，八匹頭馬都係守前六位入直路，而且總共有六匹放頭馬上名，可見狹窄場地對擺前走馬匹始終較有利，留得太後好難追。
今戰列陣馬中，第三場「海嵐一號」上仗正是於4月16日田C加3欄配蔣嘉琦快放入Q，今次移欄、配搭及路程均不變，必求贏馬補中。另外，第九場「飛廉之子」三次跑田C加3欄都未輸過，場地專家隨時可以回復表現。
至於兩場泥地路程皆為1650米，近三場同程之放頭馬「你好馬」、「步步領先」及「快快贏」都非勝即位，其中「你好馬」及「步步領先」適逢又在今戰上陣，當然值得優先留意。