台灣組合S.H.E為咗慶祝出道17年，今晚喺台灣兩廳院藝文廣場舉行「十七音樂會」，早前唱片公司免費派發12,000張門票被秒殺，更有黃牛黨無本生利放上網炒，搞到成員陳嘉樺（Ella）嬲爆，喺facebook怒斥太過份（新聞連結： https://bit.ly/2N6QJra ），其後大會安排網上免費直播，等更多fans可以睇到。

演唱會今晚舉行，除咗持票觀眾外，更有唔少人專程去聽，逾15,000人一早聚集喺會場。S.H.E以唔少經典靚歌會fans，唱到《美麗新世界》時，Ella抱住囝囝「勁寶」現身台上，觀眾驚喜尖叫。未夠一歲半嘅勁寶完全唔怯場，跟住媽咪喺台上面對萬幾名觀眾，仲搶埋「甄甄阿姨」田馥甄（Hebe）支咪。Ella同任家萱（Selina）企圖分散勁寶注意力，但都唔係幾成功，勁寶攞住Hebe支咪唔願放。

S.H.E三人顧住同勁寶玩，佢哋仲講笑講可能個演唱會只會唱4、5首歌，剩下嘅時間都只會講勁寶，愛勁寶之情表露無遺。後來勁寶喺Ella嘅引導下，同觀眾講Bye Bye，又放飛吻，真係完全冇驚過。

Selina同Hebe都話唔知勁寶會出現，Ella即笑言，除咗佢哋一家三口外，係冇人知道勁寶會登場，然後又話今朝問過勁寶係咪要上台先帶佢上嚟。跟住Selina、Hebe同Ella三個輪流表達自己有幾錫勁寶，Hebe仲話被勁寶啲口水整到支咪濕晒，有「吱吱聲」，Ella隨即豪氣咁用自己件衫幫Hebe抹番支咪，非常搞笑。

精選娛聞，喺晒《娛果》
http://fb.com/appledailyent