去年憑歌曲《Gashina》而人氣急升嘅25歲女星宣美，早於2007年以女團Wonder Girls成員身份出道，當時宣美只得15歲。而宣美於噚日播出嘅綜藝節目《Talk Mon》中，首次提到當初做藝人嘅契機，同時公開咗鮮為人知嘅家庭史，令粉絲大表心痛。

宣美表示當初出道做藝人係因為爸爸：「大概係小學4年級，我同兩個弟弟、爸爸一齊生活，當時爸爸身體唔好，狀況亦一日比一日差，原來喺屋企戴住氧氣罩休養，但突然有一日病情惡化要送到醫院。」令年僅12歲嘅宣美十分無助，宣美亦不停諗：「依家爸爸郁唔到，身為長女係呢個家嘅家長，我應該點做？」

宣美續稱：「當時小學老師建議我長大後做老師，但距離呢個夢想起碼10至15年，呢段時間我要點賺錢呢？所以就決定去做藝人，因為呢個係最快嘅方法。」年幼嘅宣美一個人往返首爾及慶州四處面試，最後喺14歲正式成為JYP事務所嘅練習生，之後一個人忍住辛苦及孤獨而努力練習，一心只求出道。

因為係長女，所以患病嘅爸爸都好依賴宣美：「練習生時期都不時收到爸爸發牢騷嘅短訊『爸爸真係好攰』、『我好似要離開喇...』、『弟弟就拜託你喇』等等，無論收到幾多次呢啲短訊，我都有回覆。但有一日收到寫住『爸爸先走了』嘅短訊，我以為爸爸又發牢騷所以冇覆到，亦冇接爸爸嘅電話，點知翌日就收到爸爸離世嘅消息。」宣美坦言：「爸爸留低嘅遺書同我講，希望我來世仍然可以做佢個女，對於當時冇覆短訊、冇聽電話，至今仍然好自責。」而且當時距離出道僅3個月，令宣美更加難過。

最港電影大獎投票網址
http://bit.ly/thekongestfilmawards

更多韓流，喺晒《娛果》
http://fb.com/appledailyent