上星期二喺台灣生咗BB「小星星」嘅台灣女星陳妍希，淨係喺facebook、微博等社交網站貼咗一張BB手仔相，仲同大陸男星老公陳曉一家三口齊齊玩包剪揼。幾日後，有台灣傳媒就見到陳曉已經飛咗去台灣，喺醫院陪住老婆同BB（相關新聞： http://bit.ly/2id8nqx ）。

啱啱生完嘅媽媽，其實好多習俗要遵守，其中一個就係唔可以洗頭！因為驚入風凍親嘛，尤其係聖誕節幾日咁凍，病咗就唔可以照顧「小星星」喇！陳妍希休息咗差唔多一個禮拜，佢噚晚再貼咗一張素顏大頭相，留言話：「以前每天都要洗頭的我，這次是我這輩子撐最久一次沒洗頭，過了十天油膩膩的日子之後，此刻的心情是幸福。」

有媽媽級網民見陳妍希聽話跟足傳統，就同佢分享下啲坐月經歷，有人話要忍足30日，可以戴帽掩蓋異味，又有人話可以用薑汁洗頭沖涼，不過沖完要盡快吹番乾等等，真係當陳妍希係女一樣咁照顧。

而陳妍希今日透過就經理人回覆台灣傳媒，佢話：「前三天不能洗頭，一直流汗、覺得熱，所以不太舒服；幸好三天後就漸漸習慣了，頭髮癢的時候，開始用乾洗髮。因為有傷口，沒辦法自己洗髮，一直忍耐到進月子中心，才終於感受到洗頭的珍貴！那一刻湧上發自內心的感謝！人真的要珍惜平常得來不易的小幸福。」