所謂十年人事幾翻新，唔經唔覺，07年港姐已經係十年前嘅事，當年部份嘅佳麗好似王君馨、黃智雯咁，都已經成為大台重用嘅花旦之一，不過當年最後八強咁多人，其他幾個到底去咗邊呢？

張嘉兒
張嘉兒當年慘被質疑佢港姐冠軍嘅名銜，唔知係唔係因為咁，所以佢喺劇集入面戲份一路都唔重，嚟嚟去去都係啲閒角，做過最重要嘅只係08年奧運大台派咗佢去做主播，不過點都好，十年過去，港姐冠軍o依家都已經成為一名媽媽了。

王君馨
作為亞軍嘅王君馨，喺演藝上面嘅發展就相較行得更前，自幼已經練舞嘅佢參選完就被大台派咗去參加《舞動奇跡II》，仲拎埋冠軍，一舉成名，喺劇集演出上，佢雖然冇空降做主角，但係就勝在一步一步上，越嚟越好，上年喺《城寨英雄》飾演嘅花曼仲被觀眾大讚好睇。

周美欣
季軍嘅周美欣喺娛樂圈發展上就比較多采多姿喇，佢拎咗季軍之後本來都加入咗大台，不過唔知係唔係因為冇被重用，佢好快就係10年離開大台，轉咗去做歌手，仲出過唱片，更加去過大陸參加歌唱比賽，不過就排第10名，15年更加參加《亞洲超級名模生死鬥》，同樣獲第10名，最近佢就去咗拍網劇，經歷真係夠晒豐富。

黃智雯
雖然落選咗，但係黃智雯就被安排參加藝訓班，正式成為一名演員，出道之後由低做起，慢慢一步一步上，佢喺《巴不得爸爸》中飾演胡杏兒阿妹，因為角色需要帶眼鏡嘅佢意外成為「眼鏡妹」嘅代表，網民更追捧佢為「眼鏡娘女神」，近年多套劇集佢都係女主角之一，被大台力捧。

趙希洛
落選嘅趙希洛同樣被大台重用成為演員，雖然冇其他幾位咁一帆風順，但係佢喺演技上備受唔少網民同觀眾肯定，喺《實習天使》中飾演精神病殺人犯，更加成為代表作之一，「御用癲婆」嘅演技被觀眾大讚。

鄭瑩瑩
選完港姐鄭瑩瑩亦加入大台，不過佢就冇咁好彩喇，最多都只係喺遊戲節目做下女郎，所以佢12年就離開咗大台，轉行做公關公司。

麥皓兒
麥皓兒當年參選只係得19歲，落選後一路都喺大台工作，參演過多套劇集，又做過「味之天使」，更加係東張西望嘅主持之一。

王卉霖
07年參選港姐最後八強之一嘅王卉霖，曾經喺大台主持過財經節目《創富坊》，冇耐之後佢就轉做網台主播，專門報道財經資訊。