要在市場中揀一隻股票市值低，同時又股價偏低，之不過業務唔錯嘅股票，難度係不斷提高嘅，今次Prof J捉到一隻符合以上條件嘅股票，就係美麗家園（1237）。
雖然內地嘅房地產需求有明顯放緩迹象，對家具嘅需求亦大大減少，但係呢隻股話晒都係國家林業重點龍頭企業，佢得到中央扶持同協助，喺運用林地、財政扶持，以及進出口政策上有一定優勢，而美麗家園不但無受到內地房地產不景氣嘅影響，而上年度喺木屋及相關部件嘅出口銷售方面，都按年有所增加，令毛利率更勁升。
美麗家園意識到中國休閒旅遊市場、歐美房產復蘇發展嘅大方向，喺未來幾年，公司會花更多嘅資源同埋時間從事中國、北美高級木屋以及相關業務，以滿足兩個國家對木製品嘅需求，相信透過中美雙線發展，未來幾年公司生意額有機會倍增。
另一方面，美麗家園新開設嘅生物質新能源生產設施正式投入業務，設施主要功能係將生產嘅剩餘物，轉化而成生物質顆粒燃料，根據較保守嘅估計，年產能規模可以有成四萬噸左右，若每噸以1,000元人民幣計算，每年收入可以高達4,000萬元人民幣，能夠大大提升整體營業額及利潤。

美麗家園在未來將會走向高端產品發展，亦會同其他不同類型嘅公司合作，以及製造更多種類多元化產品，例如會同不同材料供應商合作，推出混合材料傢俱，或與太陽能離網產品公司合作，預先喺房屋裝嵌太陽能模組等等，發展進行更多新建設，咁樣就可以將美麗家園嘅毛利率提高。
假如美麗家園嘅定位無變的話，2014上半年度每股基本盈利增長有成33%，可以一望，炒股，供求角度缺一不可，小注追蹤，希望Prof J嘅蜻蜓投資法又可以大顯神通啦！

徐燦傑
齊魯國際控股首席策略總監
本欄逢周四刊出