現年52歲、4年前已做咗嫲嫲嘅劉美君，當年憑《午夜情》、《最後一夜》、《愛是無涯》等歌曲爆紅，08年首踏紅館舉行「大開色戒」演唱會，同年憑《我不賣身、我賣子宮》奪第45屆金馬獎影后，現相隔9年再踏紅館，將於10月舉行2場演唱會，最近推出咗英文專輯，久未露面嘅美魔女將會現身ViuTV《音樂密密報》撐場。

其實《音樂密密報》係環球唱片同ViuTV合作推出嘅節目，今次環球擲百萬力捧自家新人，並安排旗下歌手麥家瑜、符致逸、周殷廷等做主持，逢周一至周五晚上12時30分播出，每集5分鐘播MV同訪問，陳奕迅、譚詠麟、吳雨霏、鍾鎮濤、Gin Lee等排隊亮相，Gin Lee喺電話表示：「非常期待同開心，香港需要多啲有質素音樂平台，好期待快啲上節目宣傳新歌。」環球唱片跟大台反面，今次「拉隊」過檔撐ViuTV，明剃大台眼眉。