港澳辦副主任張曉明早前喺北京放話，指反對國安法者需否DQ參選權，係需要認真研究嘅問題，結果不出一日就有人做嘢，兩名民主派初選參選人都發現街頭出現有自己嘜頭嘅反國安法橫額，兩幅橫額設計一模一樣，只係Key咗唔同人個樣上去，懷疑係要偽造證據，畀機會政權向參選人埋手。

重申反國安　「唔使安罪名畀我」

有「立場姐姐」之稱嘅新東初選參選人何桂藍，仲有超區初選參選人王伯羽都喺街頭發現，一張印有「7月1日反國安法 打倒極權 抗爭到底」黑底黃、白字標語嘅橫額，旁邊就分別簡單印咗兩位嘅競選頭像相片。

王伯羽喺facebook出post，嘲笑呢塊核突橫額，話唔係佢哋出品，又批評有人想用國安法拉人封艇都唔使咁低手偽造證據喎。立場姐姐就質疑呢啲設計一樣、將參選人相片拼埋一齊嘅橫額喺唔同地區出現，係想針對初選參選人嘅行為，但立場姐姐無畏無懼，強調佢係反國安法，唔使特登安個罪證畀佢。

立場姐姐形容呢次係對家幫佢哋免費宣傳，佢同八方講，好難揣測人哋有咩動機，係街坊留意到呢張橫額，覺得有問題而通知佢團隊，佢就唔會特登去拆，慎防被質疑破壞他人財物，但會聲明唔係自己嘅，因為要計算選舉經費嘛。