張家輝自導自演電影《低壓槽》，將於5月3日上映，最新嘅動作篇製作特輯噚日曝光，家輝現場指導每個動作場面，入面嘅飛車、槍戰、打鬥、爆破，工作人員都嚴陣以待，家輝話：「最怕聽到大家講『咁唔得㗎喎！』，越唔得我就越要得，我就係咁衰。」

首次執導動作片嘅家輝，專登請咗韓國武術指導合作，入面一場洗衣店大型槍戰，苗僑偉雙槍亂槍掃射，張繼聰不停捱打，家輝話：「好多槍戰同動作場面，所以在拍攝上都頗繁複，我連反應彈都要自己按，自己按自己中槍都幾緊張，因為怕做得唔好。」

另外，家輝又講到，佢同元華喺廚房嘅對打戲，事前佢同華哥不停研究走位，一拳一槍都相當仔細，家輝話打呢場搞到佢心力交瘁。仲有一場重頭戲，就是飛車，當日拍攝係封咗好多區，同埋好多條街拍追逐、反車、甩尾，家輝話：「這場大型飛車，我們用了好多部車，每日拍完晚上就維修、換零件，維修不到的就要換一架新車過來。」認真係不惜工本，為咗拍出最高質素同高水準嘅飛車場面，家輝話感謝台前幕後嘅支持，有賴大家一心一意做好件事，呢個就是誠意。

精選娛聞，喺晒《娛果》
http://fb.com/appledailyent