【鳩嗚乜乜乜】達人碌卡買禮券當家用 儲里數商務位遊N國
日本歐洲里數亞洲萬里通鳩嗚乜乜乜
成日聽人話儲錢結婚,有冇諗過儲里數度蜜月?26歲嘅暖男Vincent,用不足3年時間,儲咗23萬里數,毋需靠父幹,就可以帶住拍拖9年嘅太太,去歐洲同日本共6個地點渡蜜月,仲要全程坐商務客位,sweet到爆。
平時要換里數,你會點做?梗係打去「亞洲萬里通」會員服務中心問吓,所以裡面嘅客戶服務主任,其實係真正嘅里數達人,事關佢哋日日幫人換里數,自己都換埋一份,當中Vincent、Queenie同Brian更係其中嘅佼佼者。
Vincent係會員服務中心做咗6年,可以話係神級里數達人,佢唔夠3年,已經儲咗23萬里,即係每年儲7萬至8萬里。大家都係打工仔,點解佢儲得特別快?
除咗大家都熟知嘅要點,好似日常生活盡量用到電子貨幣,即係八達通增值、食飯同買衫都碌卡之外,消費亦要多啲去一簽兩賺同埋有里數優惠嘅地方。但Vincent當然唔係咁簡單啦,佢話屋企人知佢儲緊里數,叫佢將部份家用轉做超市coupon,咁買coupon係碌卡,即係比家用都儲緊分,佢又幫女友出埋附屬卡找卡數,一個月加埋要找大約1.4萬蚊卡數,咁樣樣就已經儲到好多啦喎。
儲埋儲埋唔用,原來係為咗度蜜月。Vincent用一年時間,設計咗下面個plan,香港->大阪->東京->倫敦->冰島->倫敦->巴黎->芬蘭->香港,全程將只需13.5萬里數,即係兩個人要27萬里,就去到6個地方,玩足一個半月,仲要係全程商務客位!仲要,里數有剩夠換多一張單程首爾機票。
Vincent話如果坐經濟客位,去晒咁多個地方,其實9萬里已經得添。佢下年結婚,計劃年底就同太太渡蜜月、睇極光,佢依家有23萬里,仲差5萬里,不過對佢嚟講,有成年時間,儲多5萬里,濕濕碎啦。
要度蜜月,首先要有另一半,環遊世界一個人就可以。Brian試過幫客人用15萬分里數,遊遍4大洲,包括倫敦、巴黎、墨爾本、悉尼、三藩市、東京、大阪等。當然一般人唔會有15萬里數,唔夠又要去旅行,Queenie教大家用3萬里,可以香港來回大阪一程,以及香港來回台北一程,而如果只得2萬里,都可以去兩轉台灣。佢解釋,亞洲萬里通兌換機票,係計算飛行里數,當中包括1個openjaw及2個Stopover,所以先可以咁用盡。
右邊個咁複雜嘅plan,就係Vincent(右)下年嘅蜜月行程,機票全部用里數換,只係要比稅。(邱仲權攝)
Brian(左)、Vincent(中)及Queenie經常研究點樣儲分同兌換機票。(邱仲權攝)