經常貼相晒身材嘅無綫藝人李松蔓（前名李天縱），上星期佢喺ig貼咗同爹哋嘅舊照，原來李爸爸離世。事隔幾日，佢繼續做瑜伽作為精神寄託，佢仲話︰「無論遇見甚麼事，都要奮勇向前邁進。」

噚日佢繼續為新劇《黃金有罪》開工，化妝時佢仲自拍留言寫住︰「Daddy去世第五日，都係工作中『黃金有罪』外景，冇辦法飛返去，我相信他一定會理解嘅，睇我咁堅強他都會好欣慰嘅。」睇嚟佢漸漸走出傷痛。

而《黃》劇喺小欖沙灘拍外景，拍沙灘戲當然要着泳衣，套劇背景喺70年代，所以個個造型都好懷舊同復古，洪永城、姚子羚、何廣沛、何遠東等造型夠娘，仲有飾演夜總會舞小姐嘅四美李松蔓、吳沚默、劉以婷同劉芷希都要着懷舊款嘅泳衣。何廣沛、何遠東都戴住假髮，加埋身上土氣十足嘅泳衣造型，十分搞笑。佢哋影合照時，仲鬥晒膊同晒肉。講到晒肉，當然係四美嘅泳衣照最有睇頭，雖然一日內又凍又熱，不過佢哋好享受晒身材。而李松蔓剛走出喪父之痛，呢日都再展笑顏，佢仲喺ig留言︰「同大家一起開工，說說笑笑，心情都好返DD（啲）。」

精選娛聞，喺晒《娛果》
http://fb.com/appledailyent