效力慕遜加柏嘅德國U-21中場達侯特，早已成為豪門獵物，尤其係盛傳佢張合約有1,000萬鎊（約9,670萬港元）解約條款，絕對身有所值，其中多蒙特同利物浦屬於呼聲最高兩隊，但呢場爭奪戰近日似乎明朗化，先係英國傳媒指紅軍領隊高路普對安利簡恩投以信任一票，所以決定喺轉會市場追逐其他目標，繼而德國傳媒《TMZ》亦表示，今季為慕遜加柏喺各項賽事上陣32場入兩球嘅達侯特已經選擇加盟多蒙特，可望同祖利安韋高合組德國U-21中場拍檔。