Big Echo老闆娘劉麗萍（Apple姐）同59歲「舞王」麥德羅黃昏戀，計劃今年拉埋天窗，然而噚晚Apple姐喺社交網爆seed嗌分手：「我要跟麥德羅分手啦」、「今天有個女人打電話給我說了他們的不尋常關係和他對我所有不忠的事情，我真的徹底被傷透了！」

被未婚妻質疑出軌嘅麥德羅接受《蘋果》電話訪問，誓神劈願否認不忠：「誤會，嗰個fans攻擊我，話佢同我有嘢，佢係偏愛我嘅fans，只係我嘅學生，但佢好鍾意我。」

問到Apple姐點解覺得兩人有「景轟」？麥德羅無奈表示：「呢個fans成日套我啲嘢，然後同番Apple講，噚日佢send咗啲相畀Apple睇，搞到佢好嬲，我哋嗌咗場大交，佢走咗去，我依家都未搵到佢。」

問到係咪同女fans影過親密相激嬲Apple姐？麥德羅表示：「攬頭攬頸相一定有，抱住攬住、佢錫我塊面嗰啲，Apple睇到好嬲，火都嚟，我同佢解釋，但佢唔信我！」

直問同fans有冇發生肉體關係？有冇影過床照？麥德羅連聲否認：「冇冇冇，佢係偏愛我啫，呢個fans大我冇十年都七八年，有四個孫，做咗嫲嫲。」會唔會同fans割蓆？麥德羅話：「梗係要割蓆，我留咗言畀佢，求佢唔好搞咁多嘢，破壞我同Apple。」至於Apple姐暫時未覆。

精選娛聞，喺晒《娛果》 http://fb.com/appledailyent