由政協副主席董建華牽頭嘅香港同胞賀國慶籌委會，將於下月1、2日舉辦一連兩晚文藝晚會同青年音樂會。國慶青年音樂會係第三年搞，兩日活動製作費用合計超過$1,200萬元，將交由親建制嘅高志森導演負責製作，並會找來陳百祥（阿叻）擔任司儀。門票呢？只收$100同$200，話咁快，賣晒喇！

製作費用合計超過$1,200萬，報道一出，大家都好嘩然，$1,200萬喎？

噚日舉行咗記招，高志森當然有同大家介紹番有乜嘢節目啦，可以睇呢度：　 http://bit.ly/2fkGujJ

但查實，高生嘅訪問內容，亦非常之令人……有驚喜。

首先第一個驚喜係，呢$1,200萬，係唔包租場。仲有喎，好多歌手，包括坤哥吳業坤、胡琳、林欣彤，都係「拍膊頭」式收費…

咁$1,200萬使去邊？邀請韓國組合INFINITE嗰度使唔少。大陸不是抵制韓國嗎？高志森話：「咁呢度係香港啦！」

先睇網民留言：
老人節目，老人製作，阿伯司儀，長者觀眾!
「愛國」是一盤暴利的生意
香港人的血汗錢係俾啲奴才呃的嗎？
將國慶節目交俾低生搞，就即係叫有理性思想及正常智商既人同呢個國家劃清界線喇
愛國＝油水，你想愛國撈油水都不是容易，愛國也要有講「關係」，這班僞愛國者就形成一個利益集團，非我族類休想分一杯羹！

拿拿拿，你哋聽咗高志森點講先：

「成個國慶晚會分上下兩場，十月一日就係上半場，係相對文化傳統嘅表演，十月二號晚主力就係針對年輕人，嗰個就係國慶青年晚會，有好多外國隊伍，加埋本港嘅表演者，外隊當中包括韓星。」

至於大陸藝人，高志森點會忽略？佢話第二晚會有個BOY STORY，來自北京，成員係13至15歲，曾於韓國受訓。高志森話大陸歌手嘅選擇好多，但佢重複又重複咁話覺得呢隊BOY STORY最特別，特別在其成員係13至15歲喎。

邀韓星慶祝中華人民共和國國慶？說好的禁韓令呢？

高志森就話佢係完全冇壓力——「喺我嘅感受上，我係完全冇受過呢方面嘅壓力。話晒呢個係香港慶祝中國國慶文藝晚會，香港同胞慶祝中國國慶，咁呢度係香港啦，我覺得睇法上都係希望香港年輕人開心啫。」咦，原來高志森都知道「一國兩制」0架？

咁請咗乜嘢韓星？「『In佛甩』囉，第三次嚟香港喇！」「In佛甩」？INFINITE嘛？

高志森續稱：「『In佛甩』好勁呀，今次佢哋唱五隻歌呀！第一次嚟呢，嗰陣我哋第一次搞國慶青年音樂會，唱三隻；舊年唱四隻，今年唱五隻！」香港呢？「坤哥啦（吳業坤），仲有一位，…噏到口唇邊…er……Brian……ererer…女嗰位……erer…香港女歌手（胡琳？）第一晚就胡琳（林欣彤？）係！林欣彤！太多名喇，記唔到…噏到口唇邊。」

高志森又反覆sell佢今次呢兩晚文藝晚會人強馬壯啦，「藝術性高嘅有莫華倫啦，姚珏嘅小提琴啦，仲有一位好資深嘅鄺美雲啦，仲有胡琳啦…」下刪數百字。仲有香港舞蹈團表演改編自馬榮成作品《中華英雄》———吓？